Drejtori i Autoritetit Kombëtar të Sigurisë Kibernetike (AKSK), Igli Tafa, deklaroi se aktorë të lidhur, me shumë mundësi, me Korenë e Veriut, kanë tentuar të ndërhyjnë në infrastrukturën teknologjike të një spitali privat në Shqipëri, duke e konsideruar këtë rast si “terrorizëm kibernetik”, gjatë një mbledhje të Komisionit të Posaçëm Parlamentar të Dezinformimit, të drejtuar nga socialisti Erion Braçe dhe pa pjesëmarrjen e opozitës.
Ky ishte një zhvillim i ri dhe këtë e shprehu edhe Braçe, i cili shoqëroi deklarimet e drejtorit Tafa me batutën “ah, janë shtuar edhe këta, nuk mjaftuan iranianët??!!”, duke iu referuar sulmeve kibernetike nga aktorë të lidhur me Iranin, në verën e vitit 2022.
Në foto: Igli Tafa, Drejtor i Autoritetit Kombëtar të Sigurisë Kibernetike
Pa dhënë detaje se si u arrit në përfundimin që problematika e vërejtur në spitalin privat (të paidentifikuar) kishte burim Korenë e Veriut, Tafa doli tek pika më nevralgjike e kësaj mbledhjeje-nevoja për investime në teknologji, për t’u mbrojtur nga sulmet kibernetike.