Një makinë tip “Benz”, e cila ishte parkuar pranë vendit të quajtur “Ura e fajancës” në Korçë, është shkrumbuar nga flakët pas mesnatës së djeshme. Ngjarja ka ndodhur rreth orës 01:10 të mëngjesit të sotëm.
Mësohet se mjeti është në pronësi të shtetasit Kodian Cacani, ndërsa dyshohet për zjarrvënie të qëllimshme.
Burime bëjnë me dije se gjatë kqyrjes së kamerave të sigurisë, shihet një person duke i vënë zjarrin mjetit, duke i hedhur lëndë djegëse dhe ka marrë dëmtime gjatë vendosjes së zjarrit. Grupi hetimor ndodhet në vendngjarje për zbardhjen e plotë të rrethanave të ngjarjes.
“Në datë 06.04.2023, rreth orës 01:10, pranë vendit të quajtur “Ura e fajancës”, ka rënë zjarr në automjetin tip “Benz” në pronësi të shtetasit K. C., banues në Korçë, i cili ishte i parkuar.Grupi hetimor po punon për zbardhjen e rrethanave të ngjarjes dhe përcaktimin e shkaqeve të rënies së zjarrit”, njofton Policia.